يوم الضحك العالمي .. ^^
10:10 م
يوميات جامعية (3)
اليوم يوم الأثنين موعدنا مع كلاسات الجنائي .. طبعاً كالعادة سهر و على فكرة البارحة مارقدت كان
رقادي جداً متقطع ،, البارحة رمست بالتلفون لأول مرة مع انسانة غالية على قلبي
المهم أول كلاس كان عندنا العقوبات و استكملنا دراسة جرائم السرقة و خذنا الإختلاس ، و عطانا
الدكتور درجات الإمتحان و الحمد الله على كل حال ، إن شاء الله نعوض بامتحان السعي الثاني ..
و معروف عن الدكتور محمد الحمادي إنه ما يحب حد يضحك بالكلاس و قبل ما يخلص الكلاس سمع
شيء مثل المنبه فقال بطريقة ضحكتني رن الجرس خلص الكلاس ما أدري خلصت الحصة فضحكت
و حسيت و كأن البنات بخاطرهم يقولوا ، ايمان سكتي عن تحصلي لج هزبة من الدكتور ..
بس الحمد الله الدكتور ما قال شيء ...>>> هالمرة عدت على خير
و في كلاس الإجراءات الجزائية ما عطانا درجات المدتيرم ، بس كان الكلاس عجييب و الله
ذكر مثال و كنت خلاص بمووووووووووت من الضحك
و قاعدة وياي بنت و كان درسنا عن القبض و الحبس الإحتياطي ، و قاعدة أمثل عليها
( على أساس إنها هي اللي مقبوض عليها ) فالدكتور شافني و قال لي : ما أسولف وياها على أساس ما ألهيها
انزين و بعدين هي قعدت تسولف وياي و يوم شافت الدكتور يطالعنا ، أونها خلت عمرها تفهمني و تقول حقي انتبهي ..
بعد اللكلاس قلنا بنسأل الدكتور عن الإمتحان ، فرحت أنا وياها
و يا ريتنا ما رحنا
و الله فشلتني ..
قالت للدكتور : دكتور إيمان بتشترك بالندوة ( كنت ناوية فعلاً بس ما قلت لها أساسا ، على كيفها
ترمس بالنيابة عني ) بس إيمان تستحي ، و خلت ويهي صدق يعطي إشارات مرور
و الدكتور يضحك
و بعدين قلت للدكتور دكتور هي يوم شافتك تطالعنا خلت عمرها ما تسولف >> عسب يعرف الصدق
و طبعاً أنا استانست لأن الدكتور قال لها أنا إيمان و لا مرة قلت لها انتبهي أو المهم شيء من هالقبيل و
هذا دليل على إنها يوم قعدت وياي قعدت تسولف و على قولة الدكتور حصلت محفز
و رحنا للدكتور محمد الحمادي و قالت له نفس الشيء
قلت لها لا ترمسين بالنيابة عني و قعد الدكتور يضحك
و في كلاس الإلتزامات كملت ضحك .
اليوم ما شاء الله كله ضحك
تتصل فيني بنية أضحك ، أسلم على البناات و أنا أضحك
لحد ما خاصرتي عورتني
اللهم اجعله خير
و الله أحداث وايد صارت ودي أكتبها
إلى لقاء قريب مع يومية جديدة من يومياتي